D Vernissage vo de Mistfingge und die Unseri
(Bericht von Manu AKA Huet)
Nachdäm alli em Fasnachtsfieber erläge sind, is ändlig sowit gsi... Vernissage vorwärts marsch...
Mir hän uns alli am 11.30 bi de Parkplätz bim Restaurant Landhof in Riehe troffe. Alli mitm Suuneschin im Gsicht, weils ändlig losgange isch. Mitm e spektakuläre Grunzi Konvoi sin mr denn wie Allewiil zu dr Mistfingge-Schüüne uufegfahre. Dört achoo sin mr mitm e härzliche Willkommens-Apéro und feinem häärdöppfelsalat mit feinem Schinke dr zue begrüesst worde.
Nachdäm mr e bizli dr Durst glöscht und dr Maage gfüllt hän, isch den au scho dr Trillpfiff vom Major ertönt zum e Ständeli spiele... und wieder wie allewiil hän mrs Volk z friede gstellt... Aber mir sind nit als einzigi Gäst für e Speggdaggel zueständig gsi. Nei, eweneli spöter het den no d Basler Rolli Clique e Ständeli abgäh.
Und denn ischs sowit gsi... Mistfingge sind an dr Reihe gsi... Mitm e gwaltige Rauch und ere "Fluch der Karibik" Trance Version als Begleitmelodie isch Ihre Waage use gfahre worde. s Sujet vo dääre Fasnacht isch d Öl-Katastrophe im Golf vo Mexico gsi. Mitme Rädäbäng und Dankesredene isch es wie allewiil e Speggdaggel gsi, so wie mrs kenne.
Und weil alli guete Ding dreei sin, isch no e Schnitzelbäängler zu Gast cho und hän e paar witzigi Themene veralberet, während mir mitm "We will rock you"-Geklatsche dr Refrain agstimmt händ. Und scho hän mr wieder d Trillpfiffe vom Major ghört. s Volk het e nochschlag welle also hets nomol e Ständeli gäh.
Aschliessend isch dr Uufbruch agordnet worde, denn es isch dr Zitpunkt cho an unseri eigeni Vernissage zgoh. Mir hän uns alli am Claraplatz wieder troffe, wo mr uns grüstet hän zum spielend ins Volkshuus i marschiere, wo mr au scho sehnlichst vo unsere gschetzte Passive erwartet worde sind und als Dangg hän si den e speggdaggulärs Ständeli kriegt.
Mitm e feine und köstliche Speckguggelhopf kombiniert mit Waggis oder Bier als Apéro, hän mr uns Zit vertriebe bis denn unseres Sujet präsentiert worde isch.
"Basel isch voller Speggdaggel" isch s Thema gsi. Do in dr Stadt vo de Bebbis immer öpis los isch, wie s Tattoo, Bebbi si Jazz,s Floss am Rhy und no viel meh. Dr Major isch als römische Gott Dionysos ufträte, wo für d Speggdaggel zueständig gsi isch. s Spiel lauft als Daggeli.
Zum Ganze isch denn no e Grunzi mit dr Goldige Grunzi Broche geehrt worde. Und es het no e witeri Ehregast gäh. Den unseres Sujet isch für ei Grunzi und Gründigsmitglied sehr speziell gsi, denn er het Joor für Joor das Sujet vorgschlage und das immer wieder erfolglos. Doch dä tapferi Grunzi het nit uufgäh und druum kämpft, dass es agnoh wird. Für die Fasnacht isch es endlich mitere chline Veränderig agnoh worde und dass an sim Geburtstag. Also het är au die grossi Ehr gha si selber gschribene Rädäbäng vor Allne vorzläse.
Und denn isch es au scho em Endi zue gange. Me het dr Daag no mit emene gmietliche Zäme si usklinge loh und sich ufs grössti Speggdaggel in Form vo de drey scheenste Dääg gfreut.